Паводле паведамленняў амерыканскіх СМІ, ізраільская армія здзейсніла напад на буйную іранскую авіябазу ў Ісфахане, піша Bild.
«Мы зрабілі тое, што абяцалі», — сказала ізраільская крыніца ў размове з нямецкім выданнем.
Як стала вядома Bild ад ізраільскіх высокапастаўленых сілавікоў, прэм’ер-міністр Ізраіля Біньямін Нетаньяху, рыхтуючыся да атакі, правёў шмат гадзін, раячыся з чальцамі так званага вайсковага кабінета. Пры гэтым Ізраіль афіцыйна не бярэ на сябе адказнасці за атаку на авіябазу.
За выходныя Іран і яго проксі-сілы ў рэгіёне выпусцілі ў напрамку Ізраіля больш за 500 ракет і беспілотнікаў — пераважную большасць з іх збілі сілы СПА Ізраіля і ЗША.
Сёння іранскія СМІ спачатку паведамілі пра тры выбухі ў раёне горада Ісфахана, аднак Тэгеран не абвінавачвае Ізраіль у гэтым і не кажа пра ракетную атаку.
«У нас не было ніякіх здарэнняў ці пашкоджанняў», — заявілі ўлады Ірана.
Неўзабаве пасля гэтага яны дадалі, што іранская армія здолела збіць некалькі беспілотнікаў. Пры гэтым адзін з высокапастаўленых іранскіх чыноўнікаў сказаў Reuters, што ніякага «знешняга нападу на Іран не было».
NBC News са спасылкай на крыніцу, знаёмую з сітуацыяй, паведамляе, што ЗША не ўдзельнічалі ва ўдары Ізраіля па Іране, аднак былі наконт яго праінфармаваныя.
Выданне Jerusalem Post адзначае, што паралельна з атакай на авіябазу ў Іране выбухі былі зарэгістраваныя ў Сірыі, а таксама ў дзвюх правінцыях Ірака. Дагэтуль незразумела, што менавіта выклікала выбухі і ці стаіць за імі ізраільская армія.