У Белым доме расказалі пра затрыманне больш чым 500 нелегальных мігрантаў і выправаджэнне «сотняў» з іх. У Нью-Джэрсі паведамілі пра ператрусы і затрыманні людзей без дакументаў і грамадзян ЗША, піша Deutsche Welle.
Амерыканскія ўлады праз некалькі дзён пасля ўступлення Дональда Трампа на пасаду прэзідэнта ЗША пачалі масавую высылку мігрантаў, якія нелегальна знаходзяцца ў краіне. Ужо затрыманыя 538 чалавек, якія супрацьзаконна заехалі ў Злучаныя Штаты, «сотні» былі выправаджаныя на самалётах ВПС ЗША, заявіла ў ноч на пятніцу, 24 студзеня, прэс-сакратар Трампа Кэралайн Лівіт на платформе X.
Паводле яе, цяпер «адбываецца самая маштабная дэпартацыя ў гісторыі». Памежнае агенцтва ЗША пацвердзіла затрыманне 538 чалавек, дадаўшы, што ў дачыненні да 373 з іх выдадзеныя ордары на арышт.
Мэр горада Ньюарк (штат Нью-Джэрсі) Рас Барака 23 студзеня паведаміў, што супрацоўнікі памежнай службы ICE правялі ператрусы і затрымлівалі, не паказваючы ордараў на арышт, жыхароў без дакументаў, а таксама грамадзян ЗША. Адным з затрыманых быў ветэран амерыканскай арміі, адзначыў Барака. Ён назваў такія затрыманні «абуральным актам», які парушае Канстытуцыю краіны.
Барацьба Трампа з нелегальнай іміграцыяй
Рашэнне праблемы нелегальнай іміграцыі ў ЗША было адным з ключавых абяцанняў Трампа ў яго перадвыбарнай кампаніі. Выступаючы на інаўгурацыі 20 студзеня, ён ясна даў зразумець, што ажыццявіць запланаваную масавую дэпартацыю «мільёнаў і мільёнаў» нелегальных мігрантаў, і папярэдзіў пра адпраўку вайскоўцаў да паўднёвай мяжы ЗША, каб «адбіць катастрафічнае ўварванне» ў краіну.
Пасля гэтага ў рамках першых указаў ён увёў надзвычайнае становішча на паўднёвай мяжы, якое палягчае ажыццяўленне масавай дэпартацыі нелегалаў, і адмяніў практыку catch and release (англ. «злаві і адпусці»), у рамках якой праваахоўныя органы адпускалі на свабоду мігрантаў на час чакання слуханняў у іміграцыйным судзе.
Указамі Трампа прыпыненыя праграмы па перасяленні бежанцаў і адмененае права на атрыманне амерыканскага грамадзянства дзецьмі мігрантаў па праве нараджэння на тэрыторыі ЗША. Пазней суд заблакаваў указ, які абмяжоўвае атрыманне грамадзянства па праве нараджэння.