Намеснік прэм’ер-міністра Казахстана Канат Базумбаеў пракаментаваў расшыфроўку чорнай скрыні самалёта Azerbaijan Airlines (AZAL), што пацярпеў катастрофу 25 снежня паблізу Актау, піша Tengrinews.kz. Расшыфроўка трапіла ў сеціва, і віцэ-прэм'ер адзначыў, што гэтыя запісы адрозніваюцца ад наяўнага ў экспертаў арыгіналу.
Як растлумачыў казахскі віцэ-прэм'ер, у расшыфроўцы ўдзельнічалі казахстанскія, расійскія, азербайджанскія і бразільскія эксперты.
«Усе мелі роўны доступ. Я паслухаў („злітую“ ў сеціва расшыфроўку. — Заўв. рэд.). Мне здаецца, што гэта больш перамовы наземныя, перамовы з зямлёй былі. Я не чуў там перамоваў чальцоў экіпажа. У чорнай скрыні ёсць усе перамовы, якія вялі капітан, пілот і чальцы экіпажа. Там трошкі больш. Зыходзячы з гэтага, я зразумеў, што гэта не зліў з нашай расследавальнай групы», — заявіў віцэ-прэм'ер.
Як запэўніў Базумбаеў, запіс, які трапіў у сеціва, моцна адрозніваецца ад змесціва чорных скрыняў.
«А навошта шукаць крыніцу „зліву“, калі мы не разглядаем яго як „зліў“ расшыфровак чорных скрыняў? Што ў інтэрнэце нехта нешта апублікаваў, гэта не азначае, што гэта ісціна. Тое, што апублікаванае, там вялікае адрозненне. Таму чакайце афіцыйных крыніц», — сказаў ён.
Паводле віцэ-прэм'ера, чорныя скрыні самалёта цяпер у следчай групы.
«Абломкі самалёта знаходзяцца ў ангары ў Актау, яны таксама абследаваныя адпаведнымі міжнароднымі экспертамі, яны дадуць сваё заключэнне. Матэрыялы расшыфроўкі знаходзяцца ў іншай групы, якая расследуе менавіта авіяцыйнае здарэнне: што здарылася, калі здарылася, як сябе экіпаж паводзіў — прафесійна, непрафесійна, якія каманды з зямлі былі. Я думаю, што потым адкрыццё гэтых матэрыялаў многія інсінуацыі развее», — заявіў Базумбаеў.
Ён таксама паведаміў, што ў Казахстане чакаюць публікацыі вынікаў расследавання крушэння самалёта AZAL на наступным тыдні.
Нагадаем, 25 снежня паблізу казахстанскага горада Актау ўпаў пасажырскі Embraer 190 «Азербайджанскіх авіяліній» (AZAL). На борце самалёта, які ляцеў з Баку ў Грозны, было 67 чалавек, 38 з іх загінула. У Актау самалёт скіраваўся пасля некалькіх спробаў здзейсніць пасадку ў Грозным. Не даляцеўшы да казахстанскага аэрапорта каля 3 км, ён пацярпеў крушэнне.
28 снежня Уладзімір Пуцін патэлефанаваў прэзідэнту Азербайджана Ільхаму Аліеву і папрасіў прабачэння за «трагічны інцыдэнт». На наступны дзень Аліеў абвінаваціў Расію ў спробе замяць прычыну крушэння самалёта. Ён заявіў, што на падлёце да Грознага паветранае судна было выведзенае з ладу сродкамі радыёэлектроннай барацьбы, а потым абстралянае, што прывяло да яго крушэння.
6 студзеня падчас сустрэчы са сваякамі загінулых у авіякатастрофе прэзідэнт Азербайджана Ільхам Аліеў зноў заявіў, што віна за крушэнне лайнера «ляжыць на прадстаўніках Расійскай Федэрацыі». Падчас сустрэчы ён таксама запатрабаваў пакарання для вінаватых, празрыстасці расследавання інцыдэнту і «чалавечых паводзінаў».
У Расіі на гэта адрэагавалі вельмі рэзка: напрыклад, сябра Каардынацыйнага савета пры Грамадскай палаце Расіі, палітолаг Уладзімір Карасёў назваў презідэнта Азербайджана Ільхама Аліева «пі***асам».
16 студзеня выданне Baza апублікавала перамовы пілотаў разбітага азербайджанскага авіялайнера Embraer 190 авіякампаніі Azerbaijan Airlines з дыспетчарамі ў Грозным (Чачня, Расія). Незадоўга да гэтага кіраўнік МЗС Расіі Сяргей Лаўроў заявіў, што першыя дадзеныя расшыфроўкі чорных скрыняў па катастрофе самалёта авіякампаніі AZAL у Актау не пацвярджаюць частку інфармацыі пра інцыдэнт, якая фігуруе ў СМІ.