Дзіця гродзенкі з сярэдзіны лістапада крала цацкі з крамы «Детмир» на вуліцы Агінскага. За два месяцы дзіця вынесла тавараў амаль на тысячу рублёў. Калі гродзенка выявіла, што цацкі скрадзеныя, яна вырашыла падаць заяву ў суд на супрацоўнікаў крамы. На думку жанчыны, адказнасць за прапажу тавару ляжыць на іх, піша Hrodna.life.
Гродзенка Фаіна апублікавала відэа ў TikTok 19 студзеня. Праз 20 гадзін пасля публікацыі ролік быў выдалены. За гэты час яго паглядзелі больш за сто тысяч карыстальнікаў, каля тысячы чалавек пакінулі свае каментары.
Машынкі краме вярнулі, а канструктар не ўдалося
Дзевяцігадовае дзіця Фаіны прыносіла дадому новыя цацкі з сярэдзіны лістапада. Жанчына звярнула на гэта ўвагу, але дзіця сказала, што ўзяло іх у знаёмага хлопчыка. Са словаў гарадзенкі, яна не надала асаблівага значэння гэтаму эпізоду.
Ужо 18 студзеня да Фаіны звярнулася прадавачка з крамы «Детмир» і паведаміла, што яе дзіця скрала цацкі. «Прынесла мне скрынкі ад гэтых цацак: там былі машынкі Hot Wheels і, атрымліваецца, Lego. Цацкі я аддала ёй, Lego мы не змаглі [аддаць], бо яно разабранае», — расказала ў відэа Фаіна. Гродзенка запэўніла, што за Lego яна «адназначна заплаціць».
Дзіця вынесла цацак амаль на тысячу рублёў
Фаіну абурыла, што яе дзіця два месяцы прыходзіла ў краму і бесперашкодна выносіла цацкі. Але прэтэнзіі ў гродзенкі ўзніклі не да дзіцяці, а да супрацоўнікаў крамы.
«Атрымліваецца, яны сёння яго злавілі за руку і прывялі да мяне. То-бок два месяцы вы не бачылі, <…> што ў вас тавару скралі на тысячу беларускіх рублёў?» — абураецца гродзенка.
Жанчына плануе судзіцца з крамай, бо «сітуацыя немагчымая». Фаіна лічыць, што адказнасць за прапажу тавару ляжыць на супрацоўніках, адсутнасці ў краме камер і ахоўнікаў, што і стала прычынай крадзяжу. Пры гэтым гродзенка дадае, што адказнасці ўнікаць не збіраецца і будзе «адказваць за ўчынкі свайго дзіцяці».
За крадзеж з крамы сям’ю могуць паставіць у СНС
Згодна з беларускім заканадаўствам, дзеці, якія не дасягнулі 14 гадоў, не нясуць крымінальнай адказнасці. Пры гэтым сям’ю Фаіны могуць прызнаць такой, што знаходзіцца ў сацыяльна небяспечным становішчы (СНС). Гэтая працэдура прадугледжаная для праблемных сем’яў. У тым ліку ў СНС трапляюць няпоўнагадовыя, абвінавачаныя ў крадзяжах, бойках і распіванні алкаголю.
СНС прадугледжвае праверкі сям'і з боку сацыяльных работнікаў і пастаноўку дзіцяці на ўлік у дзіцячы пакой міліцыі.