Пракуратура Брэстчыны паведаміла 13 студзеня, што вынесены прысуд 44-гадоваму жыхару Іванава — 5,5 года пазбаўлення волі і штраф на 2,1 мільёна рублёў за «наўмысныя злачынствы экстрэмісцкай скіраванасці». Раней за свае данаты ён ужо заплаціў беларускім дзяржустановам 600 тысяч даляраў. Завуць асуджанага Аляксандр Дарагакупец. Media-Polesye расказвае, што ўдалося даведацца пра яго біяграфію.
Аляксандр Дарагакупец нарадзіўся 44 гады таму ў горадзе Іванава Брэсцкай вобласці. Паводле звестак ініцыятывы групы лічбавай разведкі, у Беларусі няма іншага чалавека такога ўзросту з такім імем і сям’ёй.
Як паведамляе BELPOL, у перыяд з 2002-га да 2008 года Аляксандр працаваў інжынерам-сістэматэхнікам у кампаніі «Конфи», што займалася оптавым продажам мясных вырабаў. З 2008-га да 2010 года ён працаваў ва ўніверсітэце МІПСА, а з 2013 года лічыўся прыватным прадпрымальнікам. Падрабязнейшая інфармацыя пра яго кар’еру адсутнічае.
У Аляксандра ёсць жонка і двое дзяцей, якія жывуць у Іванаве.
Дарагакупца затрымалі не пазней за жнівень 2024 года. Яго абвінавачвалі па пяці артыкулах Крымінальнага кодэкса:
- ч. 6 арт. 16 і ч. 3 арт. 130 (Дапамаганне ў наўмысных дзеяннях, скіраваных на распальванне сацыяльнай варожасці па прыкмеце іншай сацыяльнай прыналежнасці);
- ч. 3 арт. 361−1 (Уваходжанне ў склад экстрэмісцкага фарміравання з мэтай здзяйснення злачынства экстрэмісцкай скіраванасці);
- ч. 1, ч. 2 арт. 361−2 (Фінансаванне заведамага забяспеннчая экстрэмісцкай дзейнасці, у тым ліку паўторна);
- ч. 1, ч. 2 арт. 361−4 (Спрыянне экстрэмісцкай дзейнасці);
- ч. 2 арт. 361−3 (Фінансаванне вярбоўкі, навучання, іншай падрыхтоўкі і выкарыстання жыхароў Беларусі для ўдзелу на тэрыторыі замежнай дзяржавы ва ўзброеным фарміраванні аднаго з праціўнікаў, узброеных канфліктах і ваенных дзеяннях пры адсутнасці прыкмет наёмніцтва).
За ўсё гэта яму пагражала да 12 гадоў калоніі, адзначае выданне.
Нагадаем, у пракуратуры паведамлялі, што падчас расследавання крымінальнай справы мужчына «добраахвотна пералічыў» некалькім дзяржустановам 600 тысяч даляраў.
Прысуд у законную сілу не ўступіў, можа быць абскарджаны і апратэставаны ў апеляцыйным парадку.