Каля 40 турыстаў з Беларусі, якія ехалі на аўтобусе ў Іспанію з грэцкімі шэнгенскімі візамі, затрымалі ў Германіі. Папярэдняя прычына — парушэнне правілаў выкарыстання візаў. Пра гэта «Люстэрку» расказалі некалькі крыніц. Цяпер беларусам пагражае дэпартацыя і нават забарона на ўезд у ЕС. Расказваем падрабязнасці.
Паводле інфармацыі «Люстэрка», каля 60 турыстаў паехалі на аўтобусе ў тур ад фірмы Interlux. Як гаворыцца на яе сайце, стартавалі турысты 19 жніўня з Мінска, пункт прызначэння — Іспанія, узбярэжжа Міжземнага мора. Фактычна аўтобус выехаў з Беларусі ў Латвію (каб аб’ехаць чэргі), далей перасёк тэрыторыю Польшчы — у гэтых краінах праблем не ўзнікла.
Далей турысты скіраваліся ў Германію, і на мяжы з Польшчай быў пашпартны кантроль. Падчас яго затрымалі каля 40 чалавек. З аўтобуса знялі тых беларусаў, у каго была першая паездка па грэцкай шэнгенскай візе.
Паводле нашых крыніц, грэцкія візы падарожнікам дапамагла аформіць турфірма, «бо толькі іх і было рэальна атрымаць», за гэта яны плацілі 400 рублёў.
Тыя, для каго ўезд быў паўторным, змаглі паехаць далей. А затрыманых змясцілі ў паліцэйскі ўчастак у горадзе Франкфурт-на-Одэры. Яны там знаходзяцца ўжо больш за суткі.
Што кажуць у туркампаніі?
Як звычайная грамадзянка журналістка «Люстэрка» патэлефанавала ў Interlux. Там пацвердзілі, што турыстаў сапраўды затрымалі. Цяпер кампанія на сувязі з імі.
Як кажа нашая крыніца, туркампанія актыўна імкнецца дапамагчы затрыманым турыстам і паабяцала кампенсаваць усе грошы за сапсаваны адпачынак.
Што кажуць у амбасадзе?
— Мы займаліся гэтым пытаннем, нямецкая паліцыя нам абяцала, што да вечара ўсіх адпусцяць, — сказалі ў амбасадзе Беларусі ў Германіі журналістцы «Люстэрка», якая звярнулася туды як фізічная асоба.
Па іншыя падрабязнасці амбасада адправіла нас да консула. Прадставіўшыся беларускай, у якой мама з грэцкай візай едзе ў тур па Еўропе, журналістка «Люстэрка» расказала, што чула пра падобнае затрыманне, і спытала, што рабіць у выпадку, калі ўжо набыты тур. Консул пацвердзіў, што затрымалі беларусаў, у якіх быў першы ўезд па грэцкай візе.
— У каго была першая паездка, тых знялі. З 62 чалавек больш за 20 паехалі далей, — сказаў ён. — Прадэманстравалі прынцыповасць немцы.
Як нямецкая паліцыя вызначыла, што гэта нямэтавы ўезд і турысты, да прыкладу, не скіроўваюцца ў Грэцыю? Консул патлумачыў, што яны праверылі дакументы кіроўцаў, а таксама апыталі пасажыраў.
— Яны апыталі ўсіх, людзі шчыра сказалі, што едуць у Іспанію. Паглядзелі дакументы кіроўцаў, убачылі, што кірунак зусім не грэцкі. Ды і Грэцыя трохі ў іншым кірунку, ужо адпачатку падазрэнні ўзнікаюць, — сказаў дыпламат.
— А якое пакаранне за гэта?
— Іх дэпартуюць. Візы анулююць і дэпартуюць. Не ведаю, трэба будзе потым удакладняць, з забаронай на ўезд ці не. Але нам паліцыя напісала, што візы ануляваныя. Сёння вечарам турфірма аўтобус ім дасць і іх у Беларусь адвязе.
— То-бок могуць яшчэ і забарону на ўезд накласці?
— Мы запыт рабілі, каб яны [паліцыя] растлумачылі, за што затрымалі. Яны палічылі гэта ўездам не па прызначэнні і адказалі, што гэтыя дзеянні падпадаюць пад крымінальны пераслед. У нашых грамадзян шмат такіх сітуацый, але звычайна па 1−3 выпадкі. Але каб тураўтобус [затрымалі] - такога не было.
Паводле консула, у такой сітуацыі лепш шукаць іншыя варыянты. Калі цяпер паехаць у Германію з візай іншай дзяржавы і гэта будзе першая паездка — «могуць быць праблемы».
— Я памятаю, 10 гадоў таму зыходзілі з таго, што пры адкрыцці візы трэба першы раз заязджаць у тую краіну, праз амбасаду якой ты атрымаў шэнген. Потым гэта неяк усё знікла, — тлумачыць дыпламат. — І калі было ўсё добра, нібыта на гэта ўвагі не звярталі. Больш за тое, наколькі я ведаю, нават самі консулы ў той далёкі час казалі: так-так, можна ехаць, умоўна кажучы, калі візу вам далі ў Літве, нічога, можна ехаць у Балгарыю адпачываць. Але гэтае правіла нікуды не знікла, яно заўсёды заставалася. Проста на нейкім этапе яно сцерлася, Турфірмы перасталі папярэджваць. Трошкі проста на гэта перасталі звяртаць увагу іншыя краіны. Але… трохі іншы час, таму вырашылі прадэманстраваць прынцыповасць. Турфірма сказала, што ўсё, больш у такіх сітуацыях праз Германію ехаць не будзем. Але я кажу, глядзіце, каб іншыя краіны так не пачалі рабіць.
Чытайце таксама
