У 2023 годзе органы запісу актаў грамадзянскага стану Беларусі зарэгістравалі больш за 65 тысяч фактаў нараджэння. Пра гэта сведчыць інфармацыя Міністэрства юстыцыі, піша «Позірк».
Паведамляецца, што больш за ўсё запісаў пра нараджэнне было зроблена ў Мінску (звыш 14 тыс.) і Брэсцкай вобласці (10,8 тыс.).
Па колькасці такіх запісаў можна меркаваць пра прыблізную колькасць народжаных, якіх трохі больш, чым зарэгістраваных. Па законе дзіця неабходна зарэгістраваць у ЗАГСе па месцы жыхарства бацькоў цягам трох месяцаў з дня нараджэння.
Такім чынам, летась нарадзілася больш за 65 тыс. дзяцей, улічваючы той факт, што не ўсе народжаныя былі зарэгістраваныя менавіта ў 2023-м.
У 2019 годзе ў Беларусі нарадзілася 87 602 дзіцяці. З 2020 года Белстат не публікуе звестак пра нараджальнасць і смяротнасць.
Колькасць нараджэнняў падае з 2017 года, у 2016-м нарадзілася 117 779 дзяцей.
Змяншаецца агульная колькасць насельніцтва. У 2017 годзе ў краіне жыло 9 504 704 чалавекі, на пачатак 2023-га — 9 200 617 (на 0,6% менш, чым на пачатак 2022 года, калі было 9 255 524).
Статыстыка за апошнія гады ў поўнай меры не адлюстроўвае масавую палітычную эміграцыю з Беларусі. З 2020 года з краіны з’ехала не менш за 200 тыс. чалавек, рэальная лічба можа быць у некалькі разоў большай.
Чытайце таксама
