У Беларусі збіраюцца адкарэктаваць Працоўны кодэкс. Адно з асноўных магчымых змяненняў — адмовіцца ад падаўжэння кантрактаў, а заключаць новы, калі мінае тэрмін дзеяння папярэдняга. Гэтыя намеры прадугледжаныя планам падрыхтоўкі праектаў заканадаўчых актаў на 2025 год.
Чыноўнікі хочуць адмовіцца ад падаўжэння кантракту. Прычына — каб зняць абмежаванні па тэрмінах, на які афармляецца такі дакумент.
«Напрыклад, у выпадку заключэння кантракту на тэрмін, меншы за пяць гадоў, далейшае яго падаўжэнне на новы тэрмін дапускаецца выключна ў межах пяцігадовага тэрміну яго дзеяння, — гаворыцца ў абгрунтаванні да плана падрыхтоўкі законапраектаў на 2025 год. — У сувязі з гэтым прапануецца адысці ад практыкі падаўжэння кантракту».
Улады хочуць увесці такую схему: калі заканчваецца дзеянне кантракта, трэба заключаць новы на любы тэрмін да пяці гадоў. «То-бок бакі дамовяцца незалежна ад тэрміну дзеяння папярэдняга кантракту», — пазначана ў абгрунтаванні.
Змяненні хочуць увесці для таго, каб удасканаліць кантрактную форму найму і матываваць работнікаў «на доўгія працоўныя адносіны».
Чытайце таксама
