Інтэрнэт у жніўні 2020 года адключылі з дазволу Аляксандра Лукашэнкі. Пра гэта палітык расказаў 22 лістапада на сустрэчы са студэнтамі ВНУ гуманітарнага профілю.
— Скажу шчыра, што гэта (адключэнне інтэрнэту ў краіне. — Заўв. рэд.) практычна заўсёды было з майго дазволу. Калі ў цябе дзве праблемы, ты пачынаеш узважваць. На гэтай шалі вагаў была краіна, — заявіў Лукашэнка.
Палітык таксама прыгразіў, што калі падзеі 2020 года паўторацца, то інтэрнэт «адключым наогул».
Раней кіраўнік Цэнтрвыбаркама Ігар Карпенка паабяцаў, што ўлады не будуць адключаць інтэрнэт на час прэзідэнцкіх выбараў.
— Зразумела, што эфір, інтэрнэт мы не закрыем. Зразумела, што будзе нейкае інфармацыйнае ўздзеянне. Таму я рэкамендаваў бы і нашым грамадзянам, і ўсім суб’ектам выбарчага працэсу кіравацца выключна дакладнай інфармацыяй, якую можна будзе атрымаць як праз мэсэнджары ЦВК, так і праз афіцыйны сайт ЦВК, — сказаў Карпенка.