Школьнік атрымаў цяжкія траўмы падчас футбольнай трэніроўкі ў Ашмянах. Распачатая крымінальная справа, паведамілі ў Следчым камітэце.
Паводле інфармацыі следства, днём 21 студзеня на стадыёне спартыўнай школы раённага цэнтра падчас футбольнай трэніроўкі на 11-гадовага хлопчыка звалілася пераносная брама. Дзіця атрымала цяжкія цялесныя пашкоджанні. Школьніка даставілі ў бальніцу, цяпер ён працягвае лячэнне, яго жыццю і здароўю нічога не пагражае.
Падчас расследавання высветлілі, што на трэніроўках выкарыстоўвалася пераносная металічная футбольная брама, якая належным чынам не была замацаваная. Калі дзіця павісла на пярэдняй перакладзіне, спартыўнае абсталяванне павалілася на яго.
Следчыя вывучылі дакументацыю, якая рэгламентуе асаблівасці гарантавання бяспекі жыцця і здароўя дзяцей падчас заняткаў фізічнай культурай і спортам. Нарматыўнымі актамі абавязак па праверцы спраўнасці інвентару, гатоўнасці пляцоўкі для трэніроўкі ляжыць на трэнеру. Акрамя таго, па пытаннях бяспекі такіх заняткаў, а таксама з мэтай прафілактыкі і папярэджання траўматызму ён абавязаны праводзіць інструктажы.
Згодна з матэрыяламі крымінальнай справы, 47-гадовы трэнер-выкладчык у той дзень перад пачаткам трэніроўкі не забяспечыў надзейнасці замацавання спартыўнага абсталявання, не пераканаўся ў правільнасці яго ўстаноўкі, пасля чаго прыступіў да правядзення занятку, не забяспечыўшы ахову жыцця і здароўя выхаванцаў спартыўнай школы.
Следчыя распачалі ў дачыненні да мужчыны крымінальную справу па ч. 2 арт.165 КК (Невыкананне або неналежнае выкананне абавязкаў па забяспечанні бяспекі жыцця і здароўя малагадовага, якое прывяло па неасцярожнасці да нанясення цяжкага цялеснага пашкоджання).