У Расіі падчас выбуху ў маскоўскім ЖК «Пунсовыя ветразі» цяжка паранены кіраўнік Федэрацыі бокса самаабвешчанай ДНР Армэн Саркісян. Пра гэта паведаміў ТАСС са спасылкай на аператыўныя службы расійскай сталіцы.
«Саркісян шпіталізаваны ў цяжкім стане. Загінуў яго ахоўнік», — сказаў суразмоўца агенцтва.
Выбух прагрымеў у холе жылога комплексу. Спачатку расійскія тэлеграм-каналы паведамілі, што Саркісян загінуў. Паводле інфармацыі Mash, Саркісян у рэанімацыі ў цяжкім стане.
«Папярэдне, у выніку (выбуху. — Заўв. рэд.) пацярпелі чатыры чалавекі, іх стан ацэньваецца як цяжкі. У цяперашні час яны шпіталізаваныя ў шматпрофільныя стацыянары, праводзіцца поўны комплекс дыягнастычных і лекавых мерапрыемстваў, аказваецца неабходная медыцынская дапамога», — расказалі ў маскоўскім дэпартаменце аховы здароўя.
Распачатая крымінальная справа.
Армэн Саркісян, вядомы як Армэн Горлаўскі, — данбаскі крымінальны аўтарытэт, уваходзіць у набліжанае кола Віктара Януковіча, з траўня 2014 года знаходзіцца ў міжнародным вышуку за датычнасць да арганізацыі забойстваў у цэнтры Кіева, паведамляла Служба бяспекі Украіны.
Паводле звестак СБУ, пасля поўнамаштабнага ўварвання РФ ва Украіну Саркісян удзельнічаў у стварэнні «асобнага батальёна спецпрызначэння «АрБАТ» — вербаваў у яго рэцыдывістаў, асуджаных за цяжкія злачынствы. Для гэтага ФСБ прызначыла Саркісяна так званым наглядчыкам за турмамі на часова захопленай частцы тэрыторыі Данбаса, сцвярджалі ў СБУ.
Батальён «АрБАТ» спачатку дзейнічаў на Тарэцкім кірунку, а пасля быў перакінуты ў Курскую вобласць.
Саркісяна абвінавачваюць паводле некалькіх артыкулаў КК Украіны, у тым ліку за «дапамаганне дзяржаве-агрэсару».
