Беларус заплаціў 80 еўраў за тое, каб праехаць мяжу без чаргі, а ў выніку і грошы страціў, і ў «калейцы» давялося стаяць. Сваю гісторыю ён расказаў у чаце па перасячэнні мяжы, каб папярэдзіць іншых пра ашуканца.
На зламысніка наш суайчыннік выйшаў, калі пацікавіўся магчымасцю куплі месца ў чарзе на польска-беларускай мяжы.
«Некалькі чалавек скінулі мне акаўнт аднаго і таго ж чалавека і запэўнілі, што ён дзесьці там працуе, з ім звязацца і ён дапаможа пераехаць», — падзяліўся беларус.
Мужчына напісаў «рашалу» ў телеграм. Той запэўніў, што «ўсё будзе», але «папрасіў перавесці 80 еўра па безнаяўным разліку».
«Мяне гэта збянтэжыла, але чарга настолькі вялікая, што я перавёў», — расказаў беларус.
Як толькі мужчына скінуў зламысніку пацверджанне пераводу, той перастаў адказваць на яго паведамленні.
«Пішу для таго, каб іншыя на гэтую схему не вяліся», — патлумачыў наш зямляк, выклаўшы скрыншоты перапіскі з ашуканцам.
Паводле звестак Дзяржпамежкамітэта на 8.00 2 ліпеня, выезду з Беларусі ў Польшчу чакаюць 200 легкавікоў і 55 аўтобусаў.
З польскага боку мяжы час праезду ў Беларусь праз пункт пропуску «Тэрэспаль» (з беларускага боку — «Брэст») складае 13 гадзін для аўто і 4 гадзіны для аўтобусаў, перадае сайт мытнай службы Польшчы.
Чытайце таксама
