Асуджанага на смяротнае пакаранне ў Беларусі, а потым памілаванага Рыка Крыгера абмянялі 1 жніўня. І з таго часу пра яго нічога не вядома. Мужчына не даваў ніякіх прэс-канферэнцый ці інтэрв'ю, таксама няма інфармацыі, дзе ён цяпер і што з ім. Між тым пасля абмену ўжо ў нямецкай бальніцы з Рыка быў яшчэ адзін яго ўдзельнік, грамадзянін Германіі і Расіі Кевін Лік. Ён змог пагаварыць з мужчынам. Вось што пра тую размову Лік расказаў «Люстэрку».
Цяпер Кевіну Ліку 19 гадоў, яго затрымалі, калі ён быў яшчэ школьнікам, за нібыта дзяржаўную здраду. Расійскі суд асудзіў хлопца на чатыры гады пазбаўлення волі. Лік трапіў у лік 16 зняволеных, якіх абмяняла Расія 1 жніўня.
Хлопец убачыў Крыгера ўжо ў самалёце з Расіі ў Турцыю. Менавіта там, у Анкары, і праходзіў абмен.
— Грамадзяне ЗША і Германіі Пол Уілан, Эван Гершковіч, Патрык Шэбель і Крыгер сядзелі бліжэй да пілотаў, а мы, палітвязні, — за фіранкай, таму не маглі размаўляць, — успамінае палёт Кевін. — І яны заставаліся ў самалёце апошнімі. Нас выпусцілі адразу, а іх пакінулі. Іх адпусцілі, калі на борт падняўся Красікаў. Як мне потым сказаў Крыгер, іх не выпускалі з самалёта, пакуль ён не з’явіўся. Рыка быў упэўнены, што калі б таго не прывялі, то, магчыма, яны на абмен бы і не трапілі.
Далей яны разам ляцелі з Турцыі ў Германію, але падчас гэтага рэйса Ліку і Крыгеру пагаварыць не ўдалося. Раззнаёміліся яны ўжо ў нямецкай бальніцы, куды іх адвезлі адразу пасля прызямлення, каб абследаваць.
— Рыка расказваў, што на яго ў Германіі распачалі крымінальную справу, — сцвярджае Кевін. — Ён тлумачыў, што нямецкія следчыя павінныя разабрацца, гэта прадугледжана нейкім міжнародным пактам праз тое, што Рыка абвінавацілі ў тэрарызме ў іншай краіне. Яшчэ ён казаў, што ў межах гэтай крымінальнай справы ў яго сяброўкі ці сваячкі (я дакладна не зразумеў) прайшлі ператрусы. Паводле Крыгера, іх праводзіла паліцыя.
Стан Крыгера Лік апісвае як шокавы. Пра свае нягоды ў Беларусі ён не расказваў.
— Я не распытваў, бо гэта вялікая траўма і я ўяўляю, што ён перажыў, — кажа Кевін і дадае, што візуальна немец выглядаў нармальна, ран ці слядоў збіцця на ягоным твары і целе відаць не было.
— Рыка падаўся мне звычайным чалавекам, — працягвае Лік. — Не думаю, што ён нейкі агент спецслужбаў. Ён медык па адукацыі. Мы хадзілі па бальніцы ў суправаджэнні яе супрацоўнікаў, ён расказваў пра тэхніку, якая там была, казаў, што сам працаваў у падобным месцы, быў санітарам.
Паводле Кевіна, Крыгер зусім няшмат расказаў пра тое, як апынуўся ў Беларусі, але ў дэталі не заглыбляўся:
— Ён паўтараў, што быў санітарам у Германіі, працаваў дзесьці ў ваколіцах Берліна. Хацеў паехаць ва Украіну як медык на добраахвотнай аснове. Казаў, што хацеў ратаваць людзей. Наконт яго дзейнасці, звязанай са спецслужбамі, я нічога сказаць не магу, не заглыбляўся ў гэта. Тым больш, разумееце, у яго цяпер справа ў Германіі і ўсё, што пра яго напішуць, могуць выкарыстаць супраць яго. Я так разумею, што там была правакацыя. Магчыма, з боку спецслужбаў. Але я прыйшоў да гэтай высновы пасля таго, як прачытаў пра ягоную справу ў СМІ. Падчас размовы з Рыка ў бальніцы я пра гэта нічога не ведаў.
Чытайце таксама
